ಹೊಸದೆಹಲಿ: ಇಲ್ಲಿನ ಏಮ್ಸ್ ಆಸ್ಪತ್ರೆಯ ವೈದ್ಯರು ಹೊಸ ಅಧ್ಯಯನ ಮಾಡಲು ಮುಂದಾಗಿದ್ದಾರೆ.
ಕರೋನಾ ವೈರಸ್ ಮೃತ ಶರೀರದಲ್ಲಿ ಎಷ್ಟು ದಿನಗಳ ಕಾಲ ಬದುಕಲಿದೆ ಮತ್ತು ಮೃತ ಶರೀರದಿಂದ ಸೋಂಕು ಹರಡಲು ಸಾಧ್ಯವಿದೆಯೇ? ಎಂಬುದನ್ನು ಪತ್ತೆ ಹಚ್ಚಲು ಮುಂದಾಗಿದ್ದಾರೆ.
ಈ ಸಂಶೋಧನೆಗಾಗಿ ಕೋವಿಡ್ 19ನಿಂದ ಮೃತ ಪಟ್ಟ ಶರೀರವೊಂದನ್ನು ಸಂಬಂಧ ಪಟ್ಟವರ ಬಳಿಯಿಂದ ಪಡೆದುಕೊಳ್ಳಲಾಗಿದೆ. ಹಾಗೂ ವೈರಾಣು ಹೇಗೆ ಅಂಗಾಂಗಳ ಮೇಲೆ ಪರಿಣಾಮ ಬೀರಲಿದೆ ಎಂಬುವುದನ್ನು ಕಂಡುಹಿಡಿಯಲು ಈ ಅಧ್ಯಯನ ಸಹಾಯವಾಗಲಿದೆ ಎಂದು ಏಮ್ಸ್ ಮುಖ್ಯ ವೈದ್ಯ ಡಾ. ಸುಧೀರ್ ಗುಪ್ತ ಮಾಧ್ಯಮಗಳಿಗೆ ತಿಳಿಸಿದ್ದಾರೆ.
ಸತ್ತವರ ಸಂಬಂಧಿಕರ ಬಳಿಯಿಂದ ಸಮ್ಮತಿ ಪತ್ರವನ್ನು ಪಡೆಯಲಾಗಿದೆ. ಈ ಅಧ್ಯಯನದಲ್ಲಿ ರೋಗಶಾಸ್ತ್ರ ಮತ್ತು ಸೂಕ್ಷ್ಮ ಜೀವವಿಜ್ಞಾನದಂತಹ ಅನೇಕ ವಿಭಾಗಗಳು ಭಾಗಿಯಾಗಲಿವೆ.
ದೆಹಲಿಯ ಎಮ್ಸ್ ನ ಈ ಪ್ರಯತ್ನವೇ ಇಂಥಹ ಸಂಶೋದನೆಯ ಮೊದಲ ಪ್ರಯತ್ನ ಎನ್ನಲಾಗಿದೆ.
ಕರೋನಾ ವೈರಾಣು ಮೃತ ಶರೀರದಲ್ಲಿ ಹೇಗೆ ವರ್ತಿಸುತ್ತದೆ, ಹೇಗೆ ಪರಿಣಾಮ ಬೀರುತ್ತದೆ ಮತ್ತು ಶರೀರದಲ್ಲಿ ಎಷ್ಟು ದಿನಗಳ ಕಾಲ ಈ ವೈರಾಣು ಬದುಕಬಲ್ಲದು ಎಂಬುವುದನ್ನು ಕಲೆಹಾಕಲು ಸಹಕಾರಿಯಾಗಲಿದೆ ಎಂದು ಹೇಳಿದ್ದಾರೆ.
