ಬೆಂಗಳೂರು: ಕರ್ನಾಟಕ ರಾಜ್ಯ ಸಾರಿಗೆ ನಿಗಮದಲ್ಲಿ ನೌಕರರ ಹಕ್ಕುಗಳನ್ನು ದಮನ ಮಾಡಲು ವ್ಯವಸ್ಥಿತ ಹುನ್ನಾರ ನಡೆದಿದೆ ಎಂದು ಚಾಲಕರು ಮತ್ತು ನಿರ್ವಾಹಕರು ಆತಂಕಗೊಂಡಿದ್ದಾರೆ. ವಿಶೇಷ ರಜೆಯ ಹೆಸರಿನಲ್ಲಿ ಸಾವಿರಾರು ನೌಕರರನ್ನು ಖಾಯಂ ಮನೆಗೆ ಕಳಿಸುವ ಸಂಚು ನಡೆದಿದೆ ಎಂಬ ಆರೋಪಗಳು ಕೇಳಿ ಬಂದಿವೆ.

ಇದಕ್ಕೆ ಜುಲೈ 7ರಂದು ಕೆ.ಎಸ್.ಆರ್.ಟಿ.ಸಿ ವ್ಯವಸ್ಥಾಪಕ ನಿರ್ದೇಶಕ ಶಿವಯೋಗಿ ಕಳಸದ, ಬಿಎಂಟಿಸಿ, ವಾಯುವ್ಯ ಸಾರಿಗೆ ಮತ್ತು ಈಶಾನ್ಯ ಸಾರಿಗೆ ವಿಭಾಗದ ವ್ಯವಸ್ಥಾಪಕ ನಿರ್ದೇಶಕರುಗಳಿಗೆ ಪತ್ರ ಬರೆದು, ಅಧಿಕಾರಿಗಳು ಮತ್ತು ನೌಕರರಿಗೆ ಒಂದು ವರ್ಷದ ವಿಶೇಷ ರಜೆ ಕೊಡುವ ಬಗ್ಗೆ ತಮ್ಮ ಅಭಿಪ್ರಾಯ ಕಳಿಸಿ ಎಂದಿದ್ದಾರೆ. ಈ ಪತ್ರ ಎಷ್ಟು ನಯವಂಚನೆಯಿಂದ ಕೂಡಿದೆ ಎಂದರೆ, ನೌಕರರ ‘ಇಚ್ಛೆಯ ಮೇರೆಗೆ’ ಒಂದು ವರ್ಷದ ರಜೆ ಮೇಲೆ ಕಳಿಸುವುದಂತೆ!

ಇದರ ಮುಖ್ಯ ಸಂಚು ಏನೆಂದರೆ, ಸಂಬಳ ಮತ್ತು ಭತ್ಯೆ ರಹಿತ ರಜೆಯಂತೆ! ಈಗಾಗಲೇ ಲಾಕ್ ಡೌನ್ ನಂತರ ಬಸ್ ಸಂಚಾರ ಆರಂಭವಾದ ಮೇಲೆ ಅನಾರೋಗ್ಯದವರಿಗೆ ಮತ್ತು 55 ವರ್ಷ ದಾಟಿದವರಿಗೆ ಡ್ಯೂಟಿ ನಿರಾಕರಿಸುತ್ತಲೇ ಅವರನ್ನು ವಿ.ಆರ್.ಎಸ್ ಹಳ್ಳಕ್ಕೆ ದೂಡುವ ಕೆಲಸ ನಡೆದಿದೆ. ಇದೇ ಸಂದರ್ಭದಲ್ಲಿ ನೌಕರರಿಗೆ ಶೇ.4 ಬಡ್ಡಿದರದಲ್ಲಿ ನೀಡುತ್ತಿದ್ದ ಗೃಹಸಾಲ ಯೋಜನೆಯನ್ನು ಸ್ಥಗಿತಗೊಳಿಸಲಾಗುತ್ತಿದೆ ಎಂದು ತಿಳಿದು ಬಂದಿದೆ.

ಪ್ರಯಾಣಿಕರ ಸಂಖ್ಯೆ ಕಡಿಮೆಯಾಯಿತು ಎಂದು ವೇತನ ರಹಿತ ರಜೆ ಮೇಲೆ ಕಳಿಸಲು ಕೆ.ಎಸ್.ಆರ್.ಟಿ.ಸಿ ಏನೂ ಸಂಪೂರ್ಣ ಖಾಸಗಿ ಸಂಸ್ಥೆಯಲ್ಲ. ಈ ಪತ್ರದಲ್ಲಿ ಬಳಸಿರುವ ಭಾಷೆಯಲ್ಲಿಯೇ ವಂಚನೆಯಿದೆ. ‘ರಜೆಯನ್ನು ಮಂಜೂರು’ ಮಾಡುವ ಬಗ್ಗೆ ಎಂಬ ವಾಕ್ಯದ ಪ್ರಕಾರ, ನೌಕರರೇ ಒಂದು ವರ್ಷದ ರಜೆ ಕೇಳುತ್ತಿದ್ದಾರೆ ಎಂದು ಬಿಂಬಿಸುವ ಯತ್ನ ನಡೆದಿದೆ.

ಇನ್ನಷ್ಟು ಓದಿ..ಕಂಡಕ್ಟರ್-ಡ್ರೈವರ್ ಗಳಿಗೆ ವೇತನ ರಹಿತ ರಜೆಗೆ ಚಿಂತನೆ?


ಸಾರಿಗೆ ಇಲಾಖೆ ವ್ಯವಸ್ಥಾಪಕ ನಿರ್ದೇಶಕರ ಪತ್ರ

ಆದರೆ. ನೌಕರರು,  ಮುಖ್ಯವಾಗಿ ಚಾಲಕರು ಮತ್ತು ನಿರ್ವಾಹಕರು ಈ ಸಲಹೆಗೆ ಸಂಪೂರ್ಣವಾಗಿ ವಿರುದ್ಧವಾಗಿದ್ದಾರೆ. ಇದು ನೌಕರರು ಅನಿವಾರ್ಯವಾಗಿ ವಿ.ಆರ್.ಎಸ್ ಪಡೆದುಕೊಳ್ಳುವಂತೆ ಮಾಡುವ, ಹುನ್ನಾರ ಎನ್ನುತ್ತಾರೆ ಸಾರಿಗೆ ನಿಗಮದ ನೌಕರರು. ಹಾಗೆಯೇ ನೌಕರರನ್ನು ಅತಂತ್ರಗೊಳಿಸುವ ವ್ಯವಸ್ಥಿತ ಹುನ್ನಾರವೂ ಇದರ ಹಿಂದೆ ಇದ್ದಂತೆ ಕಾಣುತ್ತಿದೆ.

ವಿಶೇಷ ರಜೆ, ಷರತ್ತುಗಳ ಸಜೆ..! ಏನೋ ನೌಕರರಿಗೆ ಮಹಾ ಉಪಕಾರ ಮಾಡುತ್ತಿದ್ದೇವೆ ಎಂಬಂತೆ ಈ ವಿಶೇಷ ರಜೆಯ ಬಗ್ಗೆ ಬಿಲ್ಡಪ್ ಕೊಡಲಾಗುತ್ತಿದೆ. ಮೊದಲೇ ವೇತನವಿಲ್ಲ, ಭತ್ಯೆ ಇಲ್ಲ ಜೊತೆಗೆ 14 ಷರತ್ತುಗಳಿಂದ ನೌಕರರನ್ನು ಕಟ್ಟಿ ಹಾಕಲಾಗಿದೆ. ಈ ರಜೆ ಪಡೆಯುವವರು ನಿಗಮದಲ್ಲಿ ಬಾಕಿ ಉಳಿಸಿಕೊಂಡ ಹಣಕಾಸಿನ ವ್ಯವಹಾರ ಚುಕ್ತಾ ಮಾಡಬೇಕು. ನಿಗಮದ ಯಾವ ಆರ್ಥಿಕ ಸೌಲಭ್ಯಗಳು ರಜಾ ಅವಧಿಯಲ್ಲಿ ಇವರಿಗೆ ಲಭ್ಯವಿಲ್ಲ. ಬೇರೆ ಕೆಲಸ ಮಾಡಿದರೂ ಅದರಿಂದ ನಿಗಮಕ್ಕೆ ತೊಂದರೆಯಾಗಬಾರದಂತೆ. ಇಂಥ ಷರತ್ತುಗಳನ್ನು ಉಲ್ಲಂಘಿಸಿದಲ್ಲಿ ನಿಗಮವು ಅಂಥ ನೌಕರರನ್ನು ವಜಾಗೊಳಿಸುವ ಹಕ್ಕು ಹೊಂದಿದೆಯಂತೆ. ಅಂದರೆ ಏನಾದರೂ ತಪ್ಪು ಹುಡುಕಿ ನೌಕರರನ್ನು ಖಾಯಂ ಮನೆಗೆ ಅಟ್ಟುವ ಸಂಚು ಇದರಲ್ಲಿ ಇರುವಂತಿದೆ ಎನ್ನುವ ಸಂದೇಹ ಸಾರಿಗೆ ನೌಕರರದ್ದಾಗಿದೆ.  

ಸಾರಿಗೆ ಸಚಿವ ಮತ್ತು ಡಿಸಿಎಂ ಲಕ್ಷ್ಮಣ ಸವದಿ ಮಧ್ಯ ಪ್ರವೇಶಿಸಿ ನೌಕರರ ಹಕ್ಕುಗಳನ್ನು ಕಾಪಾಡಬೇಕಿದೆ. ಇಲಾಖೆಗೆ ಹೊರೆ ಆಗಿರುವ ಲಕ್ಷ ಸಂಬಳದ ಐಎಎಸ್ ಬಿಳಿಯಾನೆಗಳ ಸಂಖ್ಯೆಯನ್ನು ಕಡಿಮೆ ಮಾಡಬೇಕು, ನಿಗಮದಲ್ಲಿ ಮೇಲ್ಮಟ್ಟದಲ್ಲಿ ಆಗುತ್ತಿರುವ ಭ್ರಷ್ಟಾಚಾರಕ್ಕೆ ಕಡಿವಾಣ ಹಾಕಬೇಕು, ಸೋರಿಕೆಯನ್ನು ನಿಲ್ಲಿಸಬೇಕು, ಆಗ ನಿಗಮ ತಾನೇ ಆರ್ಥಿಕವಾಗಿ ಭದ್ರಗೊಳ್ಳುತ್ತದೆ. ವಿಶ್ವಾಸದ ಮೇಲೆ ಒಂದು ವರ್ಷದ ರಜೆ ನೀಡುವುದಾದರೆ ಕನಿಷ್ಠ ಶೇ.60 ರಷ್ಟು ಸಂಬಳವನ್ನು ನೀಡುವ ವ್ಯವಸ್ಥೆಯನ್ನು ಸರ್ಕಾರ ಮಾಡಬೇಕಿದೆ. ಈ ಬಗ್ಗೆ ಸಾರಿಗೆ ನೌಕರರ ಸಂಘಟನೆಗಳು ತೀವ್ರ ವಿರೋಧ ವ್ಯಕ್ತಪಡಿಸಿವೆ.

ಇನ್ನಷ್ಟು ನೋಡಿ..ಕಂಡಕ್ಟರ್-ಡ್ರೈವರ್ ಗಳಿಗೆ ಅವಮಾನದ ಆರೋಪ

Leave a Reply

Your email address will not be published.

You May Also Like

ಲಾಕ್ ಡೌನ್ ಬಗ್ಗೆ ತುಟಿ ಬಿಚ್ಚಬೇಡಿ: ಸಚಿವರಿಗೆ ಸಿಎಂ ಖಡಕ್ ವಾರ್ನಿಂಗ್..!

ಬೆಂಗಳೂರು: ಸಾರ್ವಜನಿಕರಲ್ಲಿ ಲಾಕ್ ಡೌನ್ ಬಗ್ಗೆ ಗೊಂದಲ ಮೂಡಿಸಬೇಡಿ. ಸಚಿವರು ಭಿನ್ನ ಹೇಳಿಕೆಗಳನ್ನು ನೀಡಬಾರದು ಎಂದು…

ಕಣ್ಣಿಗೆ ಖಾರದ ಪುಡಿ ಎರಚಿ ರೌಡಿಶೀಟರ್ ಹತ್ಯೆ!

ಮಂಡ್ಯ : ಕಣ್ಣಿಗೆ ಖಾರದ ಪುಡಿ ಎರಚಿ ರೌಡಿ ಶೀಟರ್ ನನ್ನು ಬರ್ಬರವಾಗಿ ಕೊಲೆ ಮಾಡಿರುವ ಘಟನೆ ಜಿಲ್ಲೆಯಲ್ಲಿ ನಡೆದಿದೆ.

ಸರ್ಕಾರಿ ಪ್ರಾಥಮಿಕ ಶಾಲೆಗಳಿಗೆ 22000 ಅತಿಥಿ ಶಿಕ್ಷಕರ ನೇಮಕಾತಿ

ಉತ್ತರಪ್ರಭ ಹುದ್ದೆ: 2022-23 ನೇ ಶೈಕ್ಷಣಿಕ ಸಾಲಿನ ರಾಜ್ಯದ ಸರ್ಕಾರಿ ಪ್ರಾಥಮಿಕ ಶಾಲೆಗಳಲ್ಲಿ ಖಾಲಿ ಇರುವ…

ಇನ್ನೊಂದು ಜನ್ಮವಿದ್ದರೆ ಶಿವಣ್ಣ ಅಣ್ಣನಾಗಲಿ ಎಂದ ಜಗ್ಗೇಶ್

ನನಗೆ ಇನ್ನೊಂದು ಜನ್ಮ ಇದ್ದರೆ ಶಿವಣ್ಣನೆ ನನಗೆ ಅಣ್ಣನಾಗಿ ಬರಲಿ.. ನನ್ನ ಬದುಕಲ್ಲಿ ನಾನು ಕಂಡ ಶ್ರೇಷ್ಠಮನುಜ..ರಾಜಣ್ಣ ಅವರ ಕರೆಯುತ್ತಿದ್ದದ್ದು ದೊಡ್ಡ ನೋಟಿನ ಸಾಹುಕಾರ ಎಂದು!