ತೆಲುಗು-ಕನ್ನಡ ಅನುವಾದ ಕ್ಷೇತ್ರದಲ್ಲಿ ಸುಮಾರು ಮೂರು ದಶಕಗಳ ಕಾಲದ ಸದ್ದಿಲ್ಲದ ಕೈಂಕರ್ಯವನ್ನು ಬಿ.ಸುಜ್ಞಾನಮೂರ್ತಿ ನೆರವೇರಿಸಿದ್ದಾರೆ. ಹಂಪಿಯ ಕನ್ನಡ ವಿಶ್ವವಿದ್ಯಾಲಯದ ಪ್ರಸಾರಾಂಗದಲ್ಲಿ ಸಹಾಯಕ ನಿರ್ದೇಶಕರಾಗಿ ಕೆಲಸ ನಿರ್ವಹಿಸುತ್ತಿರುವ ಇವರು ಪುಸ್ತಕಗಳ ಸೊಗಸು, ವಿನ್ಯಾಸ ಮತ್ತು ಅಚ್ಚುಕಟ್ಟುತನದಿಂದ ಪುಸ್ತಕಲೋಕದಲ್ಲಿ ಹೆಸರಾಗಿದ್ದಾರೆ.

ವೃತ್ತಿಜೀವನದ ಜೊತೆಗೆ ಅನುವಾದದಲ್ಲಿಯೂ ಗಂಭೀರವಾಗಿ ತೊಡಗಿಸಿಕೊಂಡು ಈವರೆಗೆ 40ಕ್ಕೂ ಹೆಚ್ಚು ಕೃತಿಗಳನ್ನು ತೆಲುಗಿನಿಂದ ಕನ್ನಡಕ್ಕೆ ಅನುವಾದಿಸಿದ್ದಾರೆ.

ಮಹಾಶ್ವೇತಾದೇವಿ ಅವರ ‘ಯಾರದೀ ಕಾಡು’ ಕಾದಂಬರಿಯ ಅನುವಾದಕ್ಕೆ ಕರ್ನಾಟಕ ಸಾಹಿತ್ಯ ಅಕಾಡೆಮಿಯ ಸೃಜನಶೀಲ ಭಾಷಾಂತರ ವಿಭಾಗದಲ್ಲಿ ಪುಸ್ತಕ ಬಹುಮಾನ (2003) ಹಾಗೂ ಆಂಧ್ರಪ್ರದೇಶದ ಚಾರಿತ್ರಿಕ ರೈತ ಹೋರಾಟವನ್ನು ಆಧರಿಸಿದ ‘ತೆಲಂಗಾಣ ಹೋರಾಟ’ಕೃತಿಗೆ ಕರ್ನಾಟಕ ಸಾಹಿತ್ಯ ಅಕಾಡೆಮಿಯ ಸೃಜನೇತರ ವಿಭಾಗದ ಪುಸ್ತಕ ಬಹುಮಾನ (2013) ಸಂದಿದೆ. ಕುವೆಂಪು ಭಾಷಾ ಭಾರತಿ ಪ್ರಾಧಿಕಾರವು 2016ನೇ ಸಾಲಿನ ಗೌರಪ್ರಶಸ್ತಿಯನ್ನು ನೀಡಿ ಸನ್ಮಾನಿಸಿದೆ.

ಅಸಮರ್ಥನ ಜೀವನ ಯಾತ್ರೆ, ಬೆಕ್ಕಿನ ಆತ್ಮಕತೆ, ನೇಣುಗಂಬದ ನೆರಳಿನಲ್ಲಿ, ನಮಗೆ ಗೋಡೆಗಳಿಲ್ಲ, ಜಾತಿವಿನಾಶ, ದಲಿತತ್ವ, ಕುಟುಂಬ ವ್ಯವಸ್ಥೆ, ಮಾರ್ಕ್ಸ್ ವಾದ-ಸ್ತ್ರೀವಾದ, ಪುರುಷ ಅಹಂಕಾರಕ್ಕೆ ಸವಾಲು, ದಲಿತ ಹೋರಾಟಗಾರ ಅಯ್ಯನ್ ಕಾಳಿ, ಜಾತಿ ವಿನಾಶ ವರ್ಗ ವಿನಾಶ, ತಮಿಳು ಬೌದ್ಧ ದಲಿತ ಹೋರಾಟಗಾರ ಅಯೋತಿದಾಸ್, ತಾಯಿಕಾಡು, ಪೆರಿಯಾರ್ ಜೀವನ ಚಳವಳಿ, ಮತಾಂಧತೆ ಮತ್ತು ಮಾನವೀಯತೆ, ತೆಲಂಗಾಣ ಹೋರಾಟ, ರಮಾಬಾಯಿ ಅಂಬೇಡ್ಕರ್ ಜೀವನಚಿತ್ರ, ದಲಿತರು ಮತ್ತು ಪ್ರಭುತ್ವ, ಆಂಧ್ರಪ್ರದೇಶದ ಶತಮಾನದ ದಲಿತ ಚಳವಳಿ, ಅಮೆರಿಕನಿಜಂ, ಕತ್ತಲ ನಕ್ಷತ್ರ, ಒಡೆದ ಕನ್ನಡಿ, ಆದಿವಾಸಿ ಹೋರಾಟಗಾರ ಕೊಮುರಂ ಭೀಮು, ಜಾತಿಯ ನೆರಳಲ್ಲಿ ಅಭಿವೃದ್ಧಿ ರಾಜಕೀಯ, ಮನೆ ಕೆಲಸ ಮತ್ತು ಹೊರಗಿನ ಕೆಲಸ, ಇಂಟಲೆಕ್ಚುವಲ್ ಗೂಂಡಾಗಳು, ಗೊಲ್ಲರು ಮತ್ತು ಕುರುಬರು, ಆಧ್ಯಾತ್ಮಿಕ ಫ್ಯಾಸಿಸ್ಟರು ಬ್ರಾಹ್ಮಣರು, ಹೊಲೆಯತತ್ವ, ಹಿಂದೂಧರ್ಮ ಅಂತರ್ಯುದ್ಧ ಲಕ್ಷಣಗಳು ಸುಜ್ಞಾನಮೂರ್ತಿಯವರು ಅನುವಾದಿಸಿರುವ ಕೃತಿಗಳು.

ಇಷ್ಟು ವಿಶಾಲವಾದ ಅನುವಾದ ಕಾರ್ಯವನ್ನು ಕೈಗೊಂಡಿರುವ ನಮ್ಮ ನಡುವಿನ ಸಹೃದಯಿ, ವಿಶಾಲ ಹೃದಯಿ, ಮಾನವಪ್ರೇಮಿ, ತತ್ವ ಬದ್ಧ ವ್ಯಕ್ತಿತ್ವದ ಬಿ.ಸುಜ್ಞಾನಮೂರ್ತಿಯವರು ಇದೇ ವರ್ಷ ವೃತ್ತಿಯಿಂದ ನಿವೃತ್ತರಾಗುತ್ತಿದ್ದಾರೆ. ಈ ಹಿನ್ನೆಲೆಯಲ್ಲಿ ಅವರ ಒಡನಾಡಿಗಳು ಒಂದು ಅಭಿನಂದನಾ ಗ್ರಂಥವನ್ನು ಸಂಪಾದಿಸಲು ತೀರ್ಮಾನಿಸಿದ್ದಾರೆ. ಮೂರು ದಶಕಗಳಿಂದ ನಿರಂತರವಾಗಿ ತೆಲುಗಿನಿಂದ ಕನ್ನಡಕ್ಕೆ ಮಹತ್ವದ ಕೃತಿಗಳನ್ನು ಅನುವಾದಿಸಿರುವ ಅವರಿಗೆ ಈ ಮೂಲಕ ಕೃತಜ್ಞತಾಪೂರ್ವಕ ಗೌರವವನ್ನು ಸಲ್ಲಿಸುವುದು ಕನ್ನಡಿಗರ ಕರ್ತವ್ಯವಾಗಿದೆ.

ಕೃತಿಯನ್ನು ಮೂರು ಭಾಗಗಳಾಗಿ ವಿಂಗಡಿಸಲು ಉದ್ದೇಶಿಸಲಾಗಿದೆ. ಮೊದಲನೆ ಭಾಗದಲ್ಲಿ ಅನುವಾದ ವಿಷಯಕ್ಕೆ ಸಂಬಂಧಿಸಿದ ಸೈದ್ಧಾಂತಿಕ ಲೇಖನಗಳನ್ನು ಮುದ್ರಿಸಲು ಯೋಜನೆ ರೂಪಿಸಲಾಗಿದೆ. ಇದರಲ್ಲಿ ಇತ್ತೀಚಿನ ಅನುವಾದ ಕ್ಷೇತ್ರ, ಅನುವಾದದ ಸಮಸ್ಯೆಗಳು ಮತ್ತು ಸವಾಲುಗಳು, ಅನುವಾದ ಕ್ಷೇತ್ರದಲ್ಲಿರುವ ಸಾಧ್ಯತೆಗಳು, ಸರಳ ಅನುವಾದದ ಸಾಧ್ಯಾಸಾಧ್ಯತೆ ಮೊದಲಾದ ಅಂಶಗಳಿರುವ ಲೇಖನಗಳಿಗೆ ಆದ್ಯತೆ ನೀಡಲಾಗುವುದು.

ಎರಡನೇ ಭಾಗದಲ್ಲಿ ಇಷ್ಟು ದಿನಗಳ ಕಾಲ ಅವರ ಒಡನಾಟದಲ್ಲಿರುವ ಅವರ ಸಹೋದ್ಯೋಗಿಗಳು, ಸಹಪಾಠಿಗಳು, ಕೃತಿಗಳ ಮೂಲಕ ಅವರ ಕೆಲಸವನ್ನು ಬಲ್ಲವರು, ಅವರ ನಂತರದ ತಲೆಮಾರಿನ ಯುವ ಬರಹಗಾರರು, ಪ್ರಕಾಶಕರು ತಮ್ಮ ಒಡನಾಟದ ಕ್ಷಣಗಳನ್ನು ಕುರಿತು ಲೇಖನಗಳನ್ನು ಪ್ರಕಟಿಸಲಾಗುವುದು.

ಮೂರನೇ ಭಾಗದಲ್ಲಿ ಅವರು ಅನುವಾದಿಸಿರುವ ಕೃತಿಗಳ ಕುರಿತು ಲೇಖನಗಳನ್ನು ಮುದ್ರಿಸಲು ಚಿಂತನೆ ನಡೆಸಲಾಗಿದೆ. ತಮ್ಮ ಬಿಡುವಿರದ ಸಮಯದಲ್ಲಿ ಆದಷ್ಟು ಶೀಘ್ರವಾಗಿ ಮೇಲಿನ ಯಾವುದೇ ವಿಭಾಗಕ್ಕೆ ಸಂಬಂಧಿಸಿದಂತೆ ಒಂದು ಲೇಖನವನ್ನು ಕಳುಹಿಸಿ ಕೊಟ್ಟರೆ, ಅನುವಾದ ಕ್ಷೇತ್ರದಲ್ಲಿ ಅನುಪಮ ಸೇವೆ ಸಲ್ಲಿಸಿದ ವ್ಯಕ್ತಿಗೆ ಕೃತಜ್ಞತೆ ಸಲ್ಲಿಸಿದಂತಾಗುತ್ತದೆ.

ಲೇಖನವನ್ನು ಜೂನ್ 30, 2020ರ ಒಳಗೆ ಕಳಿಸಬೇಕು ಎಂದು ಈ ಮೂಲಕ ಮನವಿ ಮಾಡಿಕೊಳ್ಳುತ್ತೇವೆ.

ಧನ್ಯವಾದಗಳು

ಇಂತಿ

ಬಿ.ಸುಜ್ಞಾನಮೂರ್ತಿ ಅಭಿನಂದನಾ ಸಮಿತಿ

ವಿಶೇಷ ಸೂಚನೆ: ಲೇಖನಗಳನ್ನು ಕಳುಹಿಸಬೇಕಾದ ಈಮೇಯ್ಲ್ ವಿಳಾಸ – pradeeplmalgudi@gmail.com ಅಥವಾ 9844086993 ಸಂಖ್ಯೆಗೆ ವಾಟ್ಸ್ ಅಪ್ ಮೂಲಕ ಕೂಡ ಕಳುಹಿಸಬಹುದು.

Leave a Reply

Your email address will not be published. Required fields are marked *

You May Also Like

ಶರಣ ಧರ್ಮ,ವಚನ ಸಾಹಿತ್ಯ ರಕ್ಷಕ ಮಾಚಿದೇವರು

ನಿಡಗುಂದಿ: ಕಲ್ಯಾಣ ಕ್ರಾಂತಿ ಯಲ್ಲಿ ಮಾಚಿದೇವರು ಶರಣ ಧರ್ಮ ಸಂರಕ್ಷಣೆ- ವಚನ ಸಾಹಿತ್ಯದ ರಕ್ಷಣೆಯ ಜವಾಬ್ಧಾರಿ…

ಸಂಕನೂರ್ ಅಂದಪ್ಪ ಅವರ ಸಮಾಜ ಸೇವೆ ಇತರರಿಗೂ ಆದರ್ಶ

ನಿಸ್ವಾರ್ಥ ಸಮಾಜ ಸೇವಕರ ಪೈಕಿ ಗಜೇಂದ್ರಗಡದ ಹೆಮ್ಮೆಯ ಸರಳ ಸಜ್ಜನಿಕೆಯ ಯುವಕ ಅಂದಪ್ಪ ಕಳಕಪ್ಪ ಸಂಕನೂರ ಕೂಡ ಒಬ್ಬರು ಎಂದರೆ ಅತಿಶಯೋಕ್ತಿಯಾಗಲಾರದು. ಶಿಕ್ಷಣ ಪ್ರೇಮಿ ಅಂದಪ್ಪ ಅವರು, ಶ್ರೇಷ್ಠ ವರ್ತಕ ದಿ. ಬಂಗಾರಬಸಪ್ಪ ಸಂಕನೂರ ಅವರ ಮೊಮ್ಮಗನಾಗಿದ್ದು, ಸಂಕನೂರ ಅಂದಪ್ಪ ಎಂದೇ ಚಿರಪರಿಚಿತರು.

ಕೋಟೆ ನಾಡಿನ ಪ್ರಕೃತಿ ಸೊಬಗು : ನೋಡ ಬನ್ನಿ ನಿಸರ್ಗದ ಐಸಿರಿ; ಮಲೆನಾಡಿನಂತೆ ಕಂಗೊಳಿಸುತ್ತಿವೆ ಗಜೇಂದ್ರಗಡದ ಬೆಟ್ಟಗಳು

ಐತಿಹಾಸಿಕ ನಗರಿ ಎಂದೇ ಖ್ಯಾತಿ ಪಡೆದ ಗಜೇಂದ್ರಗಡ ಸೇರಿ ಸುತ್ತಲಿನ ಬೆಟ್ಟ ಗುಡ್ಡಗಳು ಹಚ್ಚ ಹಸಿರಿನಿಂದ ಕಂಗೊಳಿಸುತ್ತಿವೆ. ಹಸಿರಿನ ನಡುವೆ ಮೈ ಮರೆತಷ್ಟು ಹೊಸದಾಗಿ ತೆರೆದುಕೊಳ್ಳುವ ಮಂಜು ಕಂಡು ಭೂ ಲೋಕದ ಸ್ವರ್ಗ ಎಂಬಂತೆ ಭಾಸವಾಗುತ್ತಿತ್ತು. ಇನ್ನು ಬೆಳಗಿನ ವೈಭವ ಮಲೆನಾಡಿನ ಬೆಟ್ಟ ಗುಡ್ಡಗಳಿಗೆ ಕಮ್ಮಿಯಿಲ್ಲ ಎನ್ನುವಷ್ಟು ಮಂಜು ಕವಿದಿತ್ತು.

ಆರೋಗ್ಯಕ್ಕೆ ಮಾರಕ ತಂಬಾಕು

ಹಾನಿಕಾರಕ ಎಂದು ತಂಬಾಕುಗಳಿoದ ಸಿದ್ಧವಾದ ಬಿಡಿ ಹಾಗೂ ಸಿಗರೇಟುಗಳ ಚೀಟು, ಪ್ಯಾಕೇಟು, ಕವರ್ ಹಾಗೂ ಬಾಕ್ಸ್ ಮೇಲೆ ಚೇಳಿನ ಚಿತ್ರದೊಂದಿಗೆ ಗಂಟಲು & ಬಾಯಿ ಕ್ಯಾನ್ಸರ್ ನ ಸ್ಪಷ್ಟ ಚಿತ್ರದೊಂದಿಗೆ ಮುದ್ರಿಸಿದ್ದರೂ ಜನರು ಹಗಲು ಕಂಡ ಬಾವಿಯಲ್ಲಿ ಇರುಳು ಹೋಗಿ ಬಿಳುವಂತ ಪರಸ್ಥಿತಿ ನಮ್ಮ ಮುಂದಿದೆ. ಒಂದು ವಯೋಮಾನದ ತರುಣರು, ತಂಬಾಕು ಮಿಶ್ರಿತ ಗುಟಕಾ, ಮಾವಾ, ಪಾನ್ ಬೀಡಾ, ಬೀಡಿ ಸಿಗರೇಟ್ ಗಳನ್ನು ಮೋಜು ಮಸ್ತಿಗಾಗಿ ಸೇವನೆ ಮಾಡುವುದು, ತಿಂದುಜಗಿಯುವುದು, ಅಗಿಯುವುದು,ಎಲ್ಲೆಂದರಲ್ಲಿ ಸಾರ್ವಜನಿಕ ಸ್ಥಳಗಳಲ್ಲಿ ಉಗಿಯುವುದು, ಹುಡುಗಿಗೆ ಹಠ ಇರಬಾರದು, ಹುಡುಗರಿಗೆ ಚಟ ಇರಬಾರದು ಎಂಬ ಮಾತು ನಿತ್ಯಸತ್ಯವಾಗಿದೆ. ಹುಡುಗರುಜಿದ್ದಿಗೆ ಬಿದ್ದವರಂತೆ ಮುಗಿ ಬಿದ್ದುಕೊಂಡು ಸೇವನೆ ಮಾಡುವುದನ್ನು ನೋಡಿದರೆ ನಮ್ಮ ಯುವ ಜನತೆ ಎತ್ತ ಸಾಗುತ್ತಿದೆ ಎಂಬುದೇ ತೋಚುತ್ತಿಲ್ಲ.